Jesus i klasserommet i Arequipa

Lucio, Paulo, Veruzka, Brigitte og Massiel er alle andreårsstudentar ved det teologiske seminaret SETELA i Arequipa. Som ein del av praksisen deira bidreg dei på samarbeidskyrkja vår, IEL-P sin skule Diego Thomson, i Arequipa. Der har dei ansvar for kristendomsundervisninga for barn frå 2. til 6. klasse.

Mange har høyrt – få høyrer til

Dei fortel at skulen, som har over 500 elevar, berre har rundt 10 % kristne elevar. Resten kjenner kanskje litt til kristen tru, men går ikkje i noka kyrkje. Det betyr at kristendomsundervisninga for svært mange barn er den viktigaste – og kanskje den einaste – plassen dei får høyre evangeliet tydeleg og jamleg.

For studentane ved SETELA gir dette ei verdifull og reell øving i å formidle evangeliet. Dei får bruke sundagsskuleopplegget til kyrkja IEL-P som undervisning på skulen. Kvar onsdag står dei framfor elevane i klasserommet og får øve seg som lærarar. Dei fortel bibelforteljingar og gir mange barn sitt aller første møte med kristen tru.

Meir enn berre kunnskap

Studentane har eit tydeleg mål og ei bøn: Dei ønskjer ikkje berre å formidle kunnskap. Dei ber om at det dei underviser i, skal skape tru hos barna – at dei får eit personleg møte med Jesus og lærer å ha Han som frelsar i liva sine. Dei håper undervisninga når heilt inn i hjarta!

Det som skjer i klasseromma i Arequipa, kan få ringverknader langt utover skuletimane. Når barn lærer å kjenne Jesus, kan det påverke familiar, vener og heile lokalsamfunn.

Samtidig får studentane ved SETELA viktig erfaring i å formidle trua si. Dei blir utrusta til teneste – til å vere både vitne og leiarar.

Dette er eit viktig arbeid, både på SETELA og i praksisen studentane får vere med på. Det formar ikkje berre dei som blir underviste, men òg dei som underviser.